Wrecsam Ifanc

Asthma

Mae yna fwy na 314,000 o bobl ag asthma yn byw yng Nghymru (www.asthma.org.uk)

Mae asthma yn gyflwr sy’n effeithio ar dy bibelli gwynt. Daw yn anodd anadlu wrth i'r pibelli gwynt gulhau a llidio (inflame).

Ymhlith y symptomau mae:

• Diffyg anadl
• Brest dynn
• Llygaid sy’n chwyddo ac yn dyfrio
• Gwich ar y frest a pheswch

Gall asthma gael ei achosi gan:

• Anwyd a pheswch
• Llygredd yr awyr
• Blew anifeiliaid
• Mwg sigaréts
• Llwch
• Mygdarthau cryf

Bydd pwl o asthma yn digwydd wrth i’r pibelli gwynt chwyddo, wrth iddynt lenwi â mwcws ac wrth i fandiau’r cyhyrau dynhau. Mae hyn yn ei gwneud yn anodd cael aer i mewn ac allan o’r ysgyfaint, sy’n ei gwneud yn anodd anadlu.

Er nad oes unrhyw beth i wella asthma yn llwyr, fe fydd y driniaeth iawn yn helpu. Cer i weld y meddyg i gael cyngor ar driniaethau.

Gall y rhai sy’n dioddef o asthma ddefnyddio cymysgedd o esmwythwyr ac atalwyr:

• Esmwythwyr: yn ymlacio’r cyhyrau yn ystod pwl, gan ddarparu rhyddhad dros dro
• Atalwyr: gall dosys rheolaidd atal pyliau a rheoli'r chwyddo yn y pibelli gwynt