Wrecsam Ifanc

Trais yn y Cartref

Mae trais yn y cartref yn fath o gamdriniaeth. Mae’n ymddygiad ymosodgar ac afreolus sy’n digwydd yn y cartref, o fewn y teulu neu o fewn perthnasau.

Gall dynion, menywod a phlant ddioddef trais yn y cartref, ond bydd yn effeithio 1 o bob pedair menyw bob blwyddyn. Hysbysir yr heddlu am un digwyddiad o drais yn y cartref bob munud.

Mathau o drais yn y cartref

• Cam-drin corfforol megis dyrnu, taro, gwthio, cicio, tynnu gwallt ayyb
• Cam-drin emosiynol megis bygythiadau, dychrynu seicolegol, creulondeb, eiddigedd gormodol ac ymddygiad awdurdodol megis peidio gadael i ti weld dy ffrindiau neu adael y tŷ, rheoli dy fywyd, dy fychanu a dy feirniadu’n rheolaidd, galw enwau neu fathau eraill o ddychrynu
• Gorfodi rhywun i gael cyfathrach rywiol neu berfformio gweithred rywiol
• Atal dy arian neu gymryd dy arian a pheidio’i ddychwelyd

Mae bob math o drais yn y cartref yn drosedd, ac mae hyn hefyd yn wir yn achos dioddefwyr sydd dan 18 oed. Mae gennyt hawl i gael dy ddiogelu rhag hyn, felly chwilia am help yn syth.

Ceisio cymorth

• Mae bod yn ddioddefydd yn dy gartref dy hun neu ddioddef oherwydd rhywun sy’n annwyl i ti yn brofiad trawmatig. Bydd llawer o bobl yn teimlo cywilydd, wedi’i bychanu ac yn unig, ond ni wnaiff dynion a merched treisgar newid heb help. Os yw dy fywyd di a bywyd unrhyw blant mewn perygl, rhaid i ti weithredu cyn y bydd yn rhy hwyr
• Gall gadael fod yn anodd fell ceisia gymorth pobl eraill. Dywed wrth dy rieni, ffrind y gelli ymddiried ynddo/ynddi neu hyd yn oed yr heddlu beth wyt yn bwriadu ei wneud i gael cymorth. Sicrha y bydd rhywun gyda thi i dy amddiffyn pan fyddi'n gadael
• Hefyd, bydd angen i ti ganfod lle diogel i fynd iddo. Gelli fynd i gartref dy rieni neu dy ffrind, ond os wyt yn poeni y gall dy bartner dy ganfod yno, mae sefydliadau a all gynnig llety cyfrinachol a diogel i ti ac unrhyw blant sydd gennyt, megis llochesi i ferched
• Mae nifer o sefydliadau sydd wedi ymroddi i gefnogi dioddefwyr trais yn y cartref megis Cymorth i Ferched, a all gynnig cyngor a chefnogaeth cyn ac ar ôl i ti adael. Maent ar gael i unrhyw ddioddefydd, nid merched yn unig
• Os byddi’n dyst i drais yn y cartref, efallai yn ymwneud â dy rieni neu dy warcheidwaid, gall beri gofid a dryswch. Os wyt mewn tŷ ble mae trais yn y cartref yn digwydd, siarada â rhywun. Gall fod yn ffrind neu aelod o’r teulu sydd ddim yn byw gyda thi, ond paid â cheisio wynebu hyn dy hun. Os nad wyt yn dymuno siarad â rhywun rwyt yn ei nabod, mae llinellau cymorth a all gynnig cyngor ynghylch sut i gynorthwyo i stopio’r trais a chael cymorth i’r dioddefydd

Os wyt ti neu rywun rwyt yn ei nabod mewn perygl uniongyrchol o drais yn y cartref, ffonia 999 i siarad â'r heddlu neu ffonia dy swyddfa heddlu leol a gofyn am yr uned cymorth trais yn y cartref.