Wrecsam Ifanc

Cyfathrebu a Phan Aiff Pethau O'u Lle

Cyfathrebu da yw'r allwedd i bob perthynas llwyddiannus â phobl yn dy fywyd, yn cynnwys dy ffrindiau, teulu, cariad, athrawon, cyflogwyr neu unrhyw un arall y mae’n rhaid i ti ymwneud â hwy.

Mae cyfathrebu da yn golygu egluro dy deimladau'n glir, gwrando ar bobl eraill a derbyn eu safbwyntiau heb ffraeo â hwy.

Y dyddiau hyn, mae sawl dull o gyfathrebu, o siarad â phobl wyneb yn wyneb, defnyddio ffôn symudol i siarad a thecstio, ar-lein gan ddefnyddio e-bost, negeseuon ebrwydd neu rwydweithiau cymdeithasol, neu ddefnyddio gwegamerâu i siarad wyneb yn rhithwir.

Mae’r adran hon yn ystyried ein dulliau gwahanol o gyfathrebu a sut i ymateb os aiff pethau o’u lle, yn cynnwys sut a ble i gael y cyngor a’r wybodaeth y bydd ei angen arnat.

Gall rheoli dy gyfathrebu â phobl yn dy fywyd fod yn anodd weithiau, a bydd camddealltwriaeth a gwrthdaro yn digwydd ym mhob perthynas. Weithiau, ni fyddant yn ddim mwy na chamddealltwriaeth. Ar brydiau, byddant yn arwain at ddadleuon a throeon eraill byddant yn fwy difrifol, megis cael dy fwlio, rhywun yn gwahaniaethu yn dy erbyn neu gamdriniaeth.

Pan aiff pethau o’u lle, mae'n hawdd iawn beio ein hunain, teimlo'n ddigalon, ofnus, pryderus neu ddryslyd, neu geisio canfod rhesymau i gyfiawnhau pam ddigwyddodd.

Y peth pwysicaf i’w gofio, os byddi’n teimlo'n neu'n ofidus neu'n bryderus, yw ceisio’r cymorth a’r cyngor angenrheidiol rhywun yr wyt yn ymddiried ynddo. Gelli hefyd ofyn i sefydliadau proffesiynol sy’n bodoli i dy helpu, dy ddiogelu a dy gefnogi fel na fydd rhaid i ti ddelio â phethau dy hun neu’n dawel.