Gwybodaeth » Pobl Yn Dy Fywyd » Gwahanu a Cholled » Gadael Cartref
Yn yr Adran Hon
Gadael Cartref
Gall gadael cartref ddigwydd oherwydd amrywiaeth o resymau – symud i rywle arall i fyw dy hun neu gyda ffrindiau, symud i mewn gyda phartner, mynd i Brifysgol neu gychwyn gweithio yn rhywle arall. Weithiau, gall gadael cartref ymddangos fel yr unig ddewis os bydd problemau gartref.
- Os wyt dros 18 oed, gelli adael cartref heb ganiatâd dy rieni
- Os wyt yn 16 neu 17 oed, bydd arnat angen caniatâd dy rieni cyn gadael. Os wyt dan 16 oed, yna nid oes gennyt unrhyw hawl i adael cartref oni bydd dy ddiogelwch mewn perygl
- Os byddi’n gadael cartref, efallai gwnei wynebu anawsterau wrth geisio rhentu cartref, oherwydd ni chaniateir i ti gael tenantiaeth nes byddi'n 18 oed
- Os wyt yn anhapus neu mewn perygl, mae pobl y gelli siarad â hwy i gael gwybodaeth, cefnogaeth a chyngor, megis cael llety mewn argyfwng. Mae’r dolenni ar waelod yr adran hon
- Os yw hynny’n briodol, siarada â dy rieni neu dy ofalwyr am dy gynlluniau. Efallai gallant dy gynorthwyo
- Efallai bydd hi'n syniad da ymweld â dy ganolfan leol cymorth tai, gweithiwr ieuenctid, neu Ganolfan Cyngor ar Bopeth, a all dy gynorthwyo i ystyried y dewisiadau
- Beth bynnag yw dy reswm dros adael cartref, cofia sicrhau fod gennyt rywle i fynd iddo. Cofia neilltuo digon o amser i chwilio am lety, oherwydd gall hyn gymryd mwy o amser na’r hyn wyt yn ei feddwl
Arian
- Mae trefnu dy arian cyn gadael cartref yn bwysig. Llunia gyllideb o dy incwm a dy wariant i weld faint elli di fforddio
- Os wyt yn bwriadu symud i dŷ rhent, bydd rhaid i ti dalu blaendal, sydd yn fis o rent ymlaen llaw fel arfer
- Os oes angen i ti brynu dodrefn ac ati, chwilia mewn siopa ail law neu gofynna i dy ffrindiau a dy deulu a oes unrhyw beth ar gael ganddynt
- Os byddi'n rhentu’n breifat, efallai byddi’n gymwys i gael help i dalu rhent
- Os wyt yn gadael gofal neu’n anabl, efallai dy fod yn gymwys i gael grant i dy gynorthwyo
- Y dewis gorau yw siarad â rhywun mewn Canolfan Cyngor ar Bopeth ynghylch dy ddewisiadau i weld pa gymorth ariannol sydd ar gael i ti cyn i ti wneud unrhyw benderfyniadau
